al is not wel

film ke bare akser kaha jata hai ki yeh keval manoranjan ke lie hoti hain per main isse sahmat nahi ho pata. filmen agar keval manoranjan hoti to ek jamane me log sadhana kut bal ke divane na hote. devanand ki tarah safed shirt aur kali pant, amitabh bachan ki tarah gale me shal lapetane ka faishan nahi chalta. filmi tarj per apradh ki ghatnayen nahi hoti. yeha tak ki bachche spiderman nahi bante aur chatra atmhatayen nahi karte. iska matlab yeh hua ki filmen manoranjan se bhi jyada bahut kuch hoti hain. manoranjan bhi kai tarah ka hota hai. inme se ek hota hai swasth manoranjan. manoranjan ke nam per vidrupta ya ashleelta, jugupsa adi ko badhawa dene ko kisi bhi tarah se manoranjan nahi kahna chahie. yeh sab baten mujhe kal rat three idiats film dekhte hue mahsoos ho rahi thi. is film ko leker pichale kafi samay se bahut sari baten sunai de rahi thi aur her nai bat ke bad lagta tha ki ise dekhana chahie. tare jameen per ki majboot kahani ke bad amir khan ko kafi sohrat mili thi. kaha ja raha tha ki yeh uske age ki film hai. amir khud rahasyamay tarike se desh bhar me ghoom-ghoom ker iska prachar ker rahe the. film ne ek saptah ke bad hi rikard kamai ker li, ise bhi bahut pracharit kia gaya. iske chatron dwara atmhatyaon ki khabren ane lagi. isi beech film ke kahanikar chetan bhagat ka vivad bhi tv chanlon per kafi dikhaya gaya. kahe ka matlab yeh ki logon ko yeh film dekhne ko majboor ker dia gaya aur achchi kamai ka poora bandobast. yeh film dekhate hue ab se kuch samay pahle ki do baten dhyan me aa rahi thi. ek manoj wajpey ka yeh kahna ki ab filmen darshak nahi taya karte. dusra jab lafter chalenj aa raha tha tab mere dimag me yeh sawal ata tha ki hamare pas koi nayak nahi hai so her koi apne tareeke se apna nayak bana raha hai. usi me raju shriwastawa jaise mashkhare laye gae aur kaha gaya yehi hasya hai. tab mujhe laga tha sharad josi ke vyangya ka kya hoga. yeh film dekhte hue bhi lag raha tha ki yeh kahna galat hai ki log jo dekhana chahte hai wahi filmon me dikhaya jata hai. ham kahna chahte hain ki log majboor hain wah sab kuch dekhne ke lie jo unhe dikhaya ja raha hai. is film me parosi gai vidrupta se man khinna ho gaya. kareeb do dashak pahle ek film dekhi thi wajood. jin logon ne dekhi hogi unhe pata hoga ki malhar (nana pateker)ne kya kurbanian di thi. wah film kai karnon se behad achchi thi (bina kisi vidrupta ke). koi bhi yeh kah sakta hai ki kisi ke dekhne me ashleelta ho sakti hai lekin jara sochie ki kya raging dikhane ke lie lain me ladkon ko nanga dikhana hi jaroori tha, padhne wale ladkon ko disterb karne ke jie kya ashllel pustken hi unke kamron me dali ja sakti thi. jab sab kuch sambhav ho ja raha hai to yeh bhi ho sakta hai ki injeeniaring ke us chatra ko balatkar ka arth na pata ho jo class me first aata raha ho lekin jis tarah balatkar ko mahimamandit kia gaya wah kya gaurwanwit hone wali bat hai ya sharm ki bat. ek sahpathi ke beemar pita aur uski ma ka jis tarah majak banaya gaya wah akchamya hai. injeeniaring ki shikcha ko leker jis tarah ka majak banaya gaya hai wah bhi adhkachara hi lagta hai. film me keval kaleg ke principal aur chatra ke pita ko dushman ki tarah pesh kia gaya hai. us sarkar ko chua bhi nahi gaya hai jo shikcha vyawastha banati hai. agar shikcha vyawastha chatron ko unki ruchi ke anuroop unka nirman karne wali banai gai hoti to principal aur pita kya dosh hota. (jri rahega)